Sol av Isfolket

Isfolket as stod som kjent i fjor haust med økonomiske utfordringar framfor seg. Gjennom vinteren har ein prøvd å løyse utfordringane, men forsøket på å refinansiere selskapet og sikre vidare drift er no diverre lagt på is. Det var klart før jul at ein ikkje ville lykkast med å setja opp ei ny oppsetning allereie til sumaren 2012 etter at Leif Stinnerbom takka for seg i fjor sumar, men arbeidet med å setja opp nytt teater sumaren 2013 vart sett igang. No har imidlertid styret i Isfolket as stoppa prosessen med refinansiering av selskapet og derav vidare drift grunna manglande ressursar til å fullføre arbeidet på noværande tidspunkt. Sjølv om ein har møtt mykje positivitet og velvilje hjå næringslivet, regionen og kommunane, strandar ein alikevel på manglande ressursar til å føre det omfattande arbeidet vidare. Selskapet Isfolket as vert ikkje avvikla, men lagt på is på noværande tidspunkt. Valdresmusea as eig Isfolket as og om det blir aktuelt å setja i gang ny aktivitet i selskapet på eit seinare tidspunkt vil vera opp til eigarane.

Anne Marit Noraker, direktør ved Valdresmusea, har denne kommentaren til vedtaket:

"Ved Valdresmusea beklagar vi sterkt at Isfolket nå leggast på is. Med Isfolket har Valdres-regionen samla seg om den største scenesatsinga i Valdres nokon gong. Oppsettinga har vore eitt av flaggskipa for Valdresmusea og har skapt ringverknader for nærings- og kulturlivet i heile Valdres. Gjennom fire år er det blitt lagt ned 24 000 frivillige arbeidstimar og utvist eit stort lokalt engasjement. Metervis av omtale i både lokal- og rikspresse har gjort Valdres synlege. Til saman har 18 000 besøkt oppsettingane.

Valdresmusea har vi sett det som viktig å gje fødselshjelp til arrangement som dette, og det vil vi fortsette å gjere. Sidan vår primære oppgåve er å drive museum, er dagleg drift av for eksempel teater noko som fordrar tett samarbeid med scenekunstmiljø og næringsliv. Slik har det vore heile vegen. Framtida til selskapet er det generalforsamlinga til Isfolket as som skal vedta. Men om aktuelle aktørar skulle invitere seg inn, vil eg arbeide for å sjå på saka på nytt."